Apèl del web « En còrs e arma».
Los practicants de la Terapia de Vidas Passadas (TVP) e de la Terapia de la Possession Espirituala (TPE), cadun amb de desparièrs estils e variantas de tractament e mejançant l’estudi de nombroses cases, nos informan que sèm d’armas qu’anam de còrs en còrs. De l’estudi d’aqueles cases dedusissèm que la reencarnacion o metempsicòsi es la via naturala d’aprendissatge e perfeccionament de las armas.
Aqueles terapèutas collabòran en lo perfeccionament de las armas tot en descobrissent e ajudant a resòlvre desparièrs genres de sofrença umana en cò de los sieus pacients. Tenent compte de la quantitat de personas encarnadas actualament qu’existisson dins lo Mond, en fasent tanben una estimacion aproximativa de las armas desencarnadas e considerant los desparièrs traumatismes individuals e collectius, pas resolguts, viscuts per la totalitat de l’Umanitat de la planeta Tèrra al cors de la siá istòria, quala es la magnitud de la chifra dels conflictes traumatics del passat, de desparièrs tipes, pendents de resòlvre qu’afèctan aquel total d’armas encarnadas e desencarnadas? Probablament de centenats de milièrs de milions.
Per ajudar impulsar aquela titanica labor de resolucion e melhorament de la consciéncia de l’arma o espirituala qu’abasta l’Umanitat entièra, un luòc web que comença amb un nombre redusit de paginas, que comprenga la descripcion de qualques cases resolguts, mas qu’aumente lo sieu contengut a una quantitat de mai en mai granda de lengas, pòt èsser un instrument fòrça efectiu aital d’arribar als individús de totes los pòbles del Mond, en emplegant una de las aisinas de l’arma collectiva de cada pòble, çò es la sieuna respectiva lenga vernaculara.
Vos animam a collaborar en aiceste projècte en ajudant de divèrsas manièras. Revirant e corregissent las siás paginas çò mai possible. En recuperant tanben, e se cal en corregissent d’acòrdi a l’original, las citacions ja tradusidas dels autors mencionats, quand ja i a d’edicions fachas en idiòma a tradusir. Seràn planvengudas las collaboracions per çò que concernís a la partida tecnica e estetica del projècte. Aquel que vòlga far una aportacion economica la poirà far dirèctament a la persona o personas qu’an collaborat e qu’an besonh de remuneracion, pr’amor que la tòca d’aiceste projècte es d’estalviar burocracia administrativa. Totas las personas e de collectius que participen en aiceste projècte, s’o vòlon aital, poiràn figurar amb lo sieu nom en la pagina de remerciaments e, de mai, dins las paginas particularas ont ajan participat.
Nòstra Umanitat avança rapidament dins cèrts vejaires de l’investigacion scientifica e tecnica, mas patís un grand retard en la coneissença de la realitat espirituala, e aquò compòrta tanben un grand retard etic. Aicesta situacion fa perilhar la continuitat de la vida dins aquela granda escòla qu’es la nòstra planeta. Amb aiceste projècte, que comença amb una informacion basica e cal pas que siga l’unic, volèm ajudar de compensar aquel desequilibri e estimular d’autres projèctes que volgan arribar mai luènh.
Equipa del luòc web En còrs e arma.
Dimars, 21 de genièr del 2020.
Traduccion: Federico Merino.